Dowladda Uganda oo sharci cusub ku soo rogtay Soomaalida doonaysa iney galaan Uganda
MudugNet, Muqdisho, Jimce, 30ka Luulyo, 2010.
Dowladda Uganda ayaa sharci cusub u samaysay dadka soomaalida ah ee doonaya iney u safraan Gudaha dalka Uganda ka dib qaraxyadii ka dhacay magaalada kampala 11 Bisha July sida uu maanta saxaafadda u sheegay safiirka soomaaliya ee Uganda danjire Sayid Axmed.
Sayid Axmed ayaa sheegay in dadka soomaalida ah aysan u safri Karin Uganda iyagoo aysan wadanin Cinwaan ama Adress-ka Cida ay u socdaan,isla markaana laga doonaayo in garoonka Diyaaradaha ay u yimaadaan dadka iyaga ka damiin ah.
Hay’adaha Amaanka Dalka Uganda ayaa Feejignaan xoog sare laga galiyay tan iyo markii qaraxyada lala eegtay magaalada kampala ,waxaana xabsiyada dalkaasi ku jira dad badan oo soomaali ay ka mid tahay.
Sharcigan ayaa ah mid dhibaato ku noqon kara soomaalida doonaysay iney u safraan dalka Uganda ,iyadoo Uganda ay ka mid tahay wadamada marti galiyay qaxootiga soomaalida ee ka cararaya Colaada Soomaaliya.
Mudugnet-News
