Xisbul Islaam oo ka gaabsatay in ay Shabaab ku eedayso Dilkii maanta loo gaystay Barre Cali Barre.
MudugNet, Muqdisho, Talaado, 9ka Maarso, 2010.
Ururka Xisbul Islaam ayaa ka gaabsaday in ay Shabaab ku eedeeyaan Dilkii maanta magaalada Muqdisho loogu gaystay Barre Cali Barre oo katirsanaa saraakiisha ugu saraysa ciidanka Xisbul Islaam.
Gudoomiye ku xigeenka maamulka gobolka Banaadir ee ururka Xisbul Islaam Ibraahin Bare Cismaan oo maanta saxaafadda kula hadlay magaalada Muqdisho ayaa xaqiijiyay in maanta magaalada Muqdisho lagu dilay sarkaal katirsanaa Ururka Xisbul Islaam.
Sarkaalkan ayaa la oran jiray Bare Cali Bare, waxaana uu ahaa taliyaha Mucaskarka Raaskambooni oo kamid ah Ururka Xisbul ISlaami, waxaana maanta rag hubeysan ay ku toogteen gudaha suuqa bakaaraha.
Gudoomiye ku xigeenka Ururka Xisbul Islaam ee Maamulka Gobolka Banaadir ayaanan ka hadlin cida ay ku tuhunsanyihiiin dilka sarkaalkan hase ahaatee waxa uu sheegay in ay baaritaan ku sameyn doonaan dhacdadadan.
